आई तू आम्हाला सोडून गेलीस…
तुझ्या लाडक्या छकुल्याला…
एका क्षणात पोरका करून गेलीस…
श्री रामाची गोष्ट आपली…
अजून अर्धवटच राहिली आहे…
घेतलं होतंस स्वेटर विणायला…
अजून ते तरी कुठे पूर्ण झालं आहे…?
शाळेत मिळालेली बक्षीस…
मी कोणाला आणून दाखवणार…?
परीक्षा आलीये तोंडावर…
आता माझा अभ्यास कोण घेणार…?
कोण करील लाड माझे…
अन कोणाकडे मी हट्ट धरू…?
खूप खुप रडावसं वाटतंय ग…
पण सांग आता कोणाच्या कुशीत शिरू…?
"आईविना पोर…" म्हणत…
आजी सारखी डोळ्यातून पाणी काढते…
तिच्या कापऱ्या आवाजात…
कशीबशी माझ्यासाठी अंगाई म्हणते…
तुझ्याच कुशीची सवय लागलीये…
आई… मला झोपच येत नाही…
का सोडून गेलीस अशी…?
या प्रश्नाचं उत्तरंच सापडत नाही… :(
आपल्या बाबाचं हसू तर…
कोणास ठाऊक कुठे हरवलंय…
तू गेल्यापासून सारखं जाणवतंय…
आम्ही खूप काही गमावलंय…
बाप्पाने तुला नेण्याआधी…
मला एकदा जरी विचारलं असतं…
माझ्या लाडक्या आई ऐवजी…
मी मलाच न्यायला लावलं असतं…
आपल्या बाप्पाकडेच राहतेस ना…
मग एकदातरी ए ग परतून…
नसेलच जमत हे तुला…
तर निदान मलातरी घे बोलावून…
येशील का ग एकदाच परत…
तुझ्याविना काळजाचा ठोकाही चुकतोय….
"पोरका" या शब्दाचा अर्थ…
रोज नव्याने सामोरा येतोय…
ये ना ग आई…
तुझा लाडका तुला हाक मारतोय…. येशील ना…?
- टिंग्याची आई
No comments:
Post a Comment