काही कविता…

खास माझ्या कवी मित्र-मैत्रिणींसाठी… :)

काही कविता असतात…
अगदी मनापासून लिहिलेल्या….
स्वतःवरच रचल्यात जणू….
फक्त स्वतःसाठीच असलेल्या….

दुसऱ्या कोणीही….
वाचू नयेत अशा वाटणाऱ्या….
अन 'त्या' खास व्यक्तीने वाचावं….
म्हणून आतुरतेने वाट पाहणाऱ्या….

एकांतात बसून….
बऱ्याचदा वाचून झालेल्या….
डोळे मिटून अनेकदा….
स्वप्नात सुद्धा पाहिलेल्या….

कधी वाचता वाचता….
डोळ्यांत पाणी आणणाऱ्या….
अन कधी कधी….
गालातल्या गालात हसणाऱ्या….

आयुष्यातले काही मोजके….
सोनेरी क्षण साठवणाऱ्या….
आनंद असो वा दुःख….
प्रत्येक क्षणी आठवणाऱ्या….

मायेच्या माणसाची….
आठवण करून देणाऱ्या….
भावनांच्या असंख्य हातांनी….
मनाला हळुवार गोंजारणाऱ्या…. 

असतात अशा काही कविता….
मनातल्या मनात लिहिलेल्या…. 
मनाच्याच एखाद्या कप्प्यात…. 
अगदी जीवापाड जपलेल्या… काही कविता…. 

- टिंग्याची आई