आई तू कधी ग येणार...??

सकाळपासून तुझी वाट बघतोय...
आई तू कधी ग येणार....??
Sack  आणि हेल्मेट दारातच टाकून ..
मला जवळ कधी घेणार...??

जेवताना आजी म्हणाली होती..
वरण भात खा मग आई येईल परत..
सगळा खाऊ खायला लावलाय बघ...
असंच काहीतरी सांगत...

रोजचा बाबांनी सांगितलेला...
आज सगळा अभ्यास केलाय...
दूध पिताना पण आजोबांना हरवून...
मी पहिला नंबर काढलाय...

खेळणी सगळी मीच उचलून..
जागेवर ठेवली आहेत...
माझ्यासारखीच ती सुद्धा...
फक्त तुझीच वाट बघत आहेत....

अग.. दुपारी मी घसरून पडलो...
वरचे दोन दात सरळ खालच्या ओठात घुसले...
खूप खूप लक्त आलं. मी खूप रडलो...
मग आजीने कडेवर घेतलं आणि बाहेर चिऊ-काऊ दाखवले...

औषध लावलंय मघाशी आजीने...
पण मला अजून पण दुखतंय..
कट्टी आता तुझ्याशी.. बोलणारच नाही...
कंटाळा आलाय.. आता मी गप्प झोपलोय...

अग बघ ना ग आई...
मी कित्ती कित्ती वेडा आहे...
झोपेत सुद्धा मला किनई...
तुझीच अंगाई ऐकू येत आहे...

डोळे उघडून पाहतोय तर..
खरच मज्जा मज्जाच झाली...
आई आज माझी खरोखर....
घरी लवकर परत आली...

मिठी मारून सारखी सारखी...
कित्ती कित्ती ग पापी घेतेस..
बाऊ झालाय मला आणि..
उगीच तू कशाला ग रडतेस...??

सांगितलंय देव बाप्पाला.. खूप मोठा पाऊस पडून..
तुझं ऑफिस वाहूनच जाऊ देत..
माझ्या सोबत खेळायला..
तुला रोज रोज सुट्टी मिळू देत...

जास्त नाही ग खरच सांगतो...
अगदी थोडूसाच तुझ्यावर रुसलो होतो..
सकाळ पासून पायरीवर बसून...
तुझीच वाट बघत होतो.....

डोळे पूस. चल लवकर.. सगळी खेळणी काढून..
दोघेच छान छान खेळत बसुया...
दमली असशील ना ग दिवसभर..
चांदोबाची उशी करून.. चांदण्यांची चादर ओढून.. दोघ निवांत झोपूया.. गुड नाईट....