तुझे सगळे विषय संपले कि काय आई…?

तुझे सगळे विषय संपले कि काय आई…?
खूप दिवस झाले काही लिहिलं नाहीस…
तुझ्या या लाडक्या टींग्यावर…
साधी चारोळी सुद्धा केली नाहीस…

घर असो वा स्कूल असो…
आता वाढल्यात ग माझ्या खोड्या…
मोबाईल गेम्स लागतात हल्ली…
चालत नाहीत मला रिमोटच्या गाड्या…  :)

आई ऑफिसमधलं काम तुझं…
खरंच खूप वाढलंय का…?
झालोय मी आता खूप मोठा…
सांग मला काही जमेल का…?

थांब…
तुझ्या कवितांचे सगळे शब्द…
मीच एकावर एक रचतो…
माझ्या लाडक्या मम्माई वर…
मी स्वतःच एक मस्त Poem करत…

मला थोडूस बर नसेल…
तर तोंड एवढूस करून बसतेस…
अन तुला कितीही ठीक नसलं…
तरी माझ्यासाठी कित्ती गोड हसतेस… या तुझ्या गोड Smile वर लिहीन… 

कितीही Tension असलं तुला…
तरी  मनापासून हसतेस…
सगळ्यांची काळजी घेताना…
स्वतःला मात्र नेमकी विसरतेस… या तुझ्या Style वर पण लिहीन…

ऑफिस, घर आणि घरातली सगळी माणस…
सगळं कसं व्यवस्थित सांभाळतेस…
जमेल तसा वेळ काढून…
छान छान कविता सुद्धा रचतेस… या तुझ्या Extra mile वर नक्की लिहीन… 

खर सांग आई जमेल का मला…?
तुझ्यासारखी मस्त कविता करायला…?
मायेने सगळ्यांना सांभाळणारी…
माझी आई शब्दांच्या धाग्यात बांधायला…?

यावर आईची गोड Smile पाहून टिंग्या म्हणतोय… 

ठाऊक आहे ग बाई मला… 
आईची माया कधी शब्दांत मावणार नाही… 
पण एखादी कविता लिहिल्याशिवाय…
टिंग्या तुझा पोरगा शोभणार नाही ;)
अन माझ्या या सगळ्या बाललीला पाहून…
तुझी लेखणी कध्धी कध्धी थांबणार नाही…

- टिंग्याची आई